એમએસપી માટે થઈ રહેલા આંદોલનને લઈને પહેલી વખત પીએમ મોદીએ આપ્યું નિવેદન

લઘુત્તમ ટેકાના ભાવ એટલે કે એમએસપીના માંગના મુદ્દે વડાપ્રધાન નરેન્દ્ર મોદીએ પહેલી વાર પોતાનું નિવેદન આપ્યું છે. તેમણે પોતાના નિવેદન આપતા કહ્યું કે એમએસપી ખેડૂતોને મળે છે અને મળતી રહેશે. આમારી સરકાર ફક્ત ખેડૂતોને ડાંગર અને ઘઉં જેવા મુખ્ય પાકો પર જ MSP નથી આપી રહી, પરંતુ અમે ખેડૂતોને આવી કઠોળ ઉગાડવા માટે પણ પ્રોત્સાહિત કરી રહ્યા છીએ, જે તેમની કમાણી વધારવામાં મદદરૂપ સાબિત થશે. અમારું ધ્યાન પાક વૈવિધ્યકરણ પર છે, અમે પાક વૈવિધ્યકરણ અપનાવતા ખેડૂતોને જરૂરી દેખરેખ તેમજ નીતિ સુરક્ષા કવચ પ્રદાન કરીશું. જણાવી દઈએ પીએમ મોદીએ આ નિવેદન પંજાબ એક ચૂંટણી પ્રચાર દરમિયાન આપ્યું હતું.

ભાજપના આગેવાનોની ગામડાઓમાં નો એન્ટ્રી

હરિયાણા અને પંજાબની સરહદો પર મોટી સંખ્યામાં ખેડૂતો MSP પર કાયદો ઘડવા અને ભાજપના નેતાઓને ગામડાઓમાં પ્રચાર કરતા રોકવા માટે વિરોધ કરી રહ્યા છે. તેને લઈને પીએમ મોદીએ કહ્યું કે અમારી સરકાર છે જેણે સાચા અર્થમાં MSP લાગુ કરી છે. છેલ્લા દસ વર્ષમાં મારી સરકારે MSPના ભાવ અને MSP હેઠળ ખરીદેલા પાકના જથ્થામાં વધારો કર્યો છે. મારી સરકારે પંજાબના ખેડૂતોના બેંક ખાતામાં MSP સીધું ટ્રાન્સફર કરવાનું શરૂ કર્યું. અમે પંજાબ અને હરિયાણાના ખેડૂતોની જરૂરિયાતોને સમજીએ છીએ અને અમે એમએસપીના મુદ્દે હંમેશા તેમની સાથે કામ કર્યું છે.

ખેડૂતોને કઠોળ ઉગાડવા માટે પ્રોત્સાહિત કર્યો

વડાપ્રધાન મોદીએ વધુમાં કહ્યું કે અમે એક ડગલું આગળ વધવા તૈયાર છીએ. અમે પંજાબ અને હરિયાણા પ્રદેશમાં મોટા પાયે ઉગાડવામાં આવતા ડાંગર અને ઘઉં જેવા મુખ્ય પાકો પર એમએસપી આપી રહ્યા છીએ એટલું જ નહીં, અમે ખેડૂતોને એવી કઠોળ ઉગાડવા માટે પણ પ્રોત્સાહિત કરી રહ્યા છીએ જેની બજારમાં મજબૂત માંગ છે. કઠોળની ખેતી ખેડૂતોને તેમની આવકમાં નોંધપાત્ર વધારો કરવામાં મદદ કરી શકે છે.

સરકાર પાક વૈવિધ્યકરણ અપનાવવા પર સુરક્ષા કવચ આપશે

પીએમ મોદીએ કહ્યું કે અમે ઈચ્છીએ છીએ કે રસ ધરાવતા ખેડૂતો પાક વૈવિધ્યકરણ અપનાવે. આપણે આવા ખેડૂતોને જરૂરી નાણાકીય અને નીતિ સુરક્ષા કવચ પૂરું પાડવું જોઈએ. તેમણે કહ્યું કે પાક વૈવિધ્યકરણને અન્ય રાજકીય પક્ષોએ પણ સમર્થન આપ્યું છે. PMએ કહ્યું કે MSP ક્યાંય નથી જઈ રહી. ભવિષ્ય માટે ખેડૂતોને સશક્ત બનાવવા અને પ્રદેશની ઇકોસિસ્ટમને બચાવવા માટે તેનો વિસ્તાર કરવામાં આવી રહ્યો છે. આપણા ખેડૂતો એ 'ઇન્ડિયા ગ્રોથ સ્ટોરી'નો આવશ્યક ભાગ છે. તેથી, મારી સરકાર વર્તમાનમાં તેમની જરૂરિયાતો પૂરી કરવા તેમજ ભવિષ્ય માટે તેમને સશક્ત અને સક્ષમ બનાવવા માંગે છે.