ભારત સહિત અનેક દેશોમાં ધરતી ધ્રૂજી, PAKમાં 9ના મોત, અફઘાનિસ્તાનથી લઈને દિલ્હી-NCR સુધી આંચકા અનુભવાયા

મંગળવારે રાત્રે લગભગ 10.20 વાગ્યે ઉત્તર ભારત, પાકિસ્તાન અને અફઘાનિસ્તાનમાં એવો ભૂકંપ આવ્યો કે લોકો હજુ પણ ગભરાટમાં છે. ઘણી જગ્યાએ લોકોએ લગભગ 30 સેકન્ડ સુધી ભૂકંપના આંચકા અનુભવ્યા.

દિલ્હી-એનસીઆરમાં ભૂકંપના કારણે ધરતી ધ્રૂજી

મંગળવારે રાત્રે દિલ્હી-NCR સહિત ઉત્તર ભારતના ઘણા ભાગોમાં ભૂકંપના આંચકા અનુભવાયા હતા. દિલ્હી-એનસીઆર ઉપરાંત ઉત્તર પ્રદેશ, જમ્મુ કાશ્મીર અને ઉત્તરાખંડમાં ભૂકંપના જોરદાર આંચકા અનુભવાયા હતા. આ આંચકા એટલા જોરદાર હતા કે લોકો તરત જ પોતાના ઘર અને એપાર્ટમેન્ટમાંથી બહાર આવી ગયા હતા. આ આંચકા પાકિસ્તાન અને અફઘાનિસ્તાનમાં પણ આવ્યા હતા. આ ભૂકંપનું કેન્દ્ર અફઘાનિસ્તાનના હિન્દુકુશ વિસ્તારમાં હતું. રિક્ટર સ્કેલ પર તેની તીવ્રતા 6.6 માપવામાં આવી હતી. જો કે, સારી વાત એ રહી છે કે ભારતમાં કોઈપણ પ્રકારના નુકસાનના સમાચાર સામે આવ્યા નથી.

આ પણ વાંચો: કિસાન સૂર્યોદય યોજના હેઠળ મળશે વીજળી, ખેડૂતો માટે 3,500 કરોડ રૂપિયાની ફાળવણી

પાકિસ્તાનમાં 6.8ની તીવ્રતાનો ભૂકંપ, અનેક લોકોના મોત

ભારતમાં જ્યારે ભૂકંપના જોરદાર આંચકા અનુભવાયા હતા, ત્યારે પાકિસ્તાનમાં પણ ભૂકંપના આંચકાએ સૌને ગભરાટમાં મુકી દીધા હતા. પાકિસ્તાનમાં આવેલા ભૂકંપની તીવ્રતા 6.8 માપવામાં આવી હતી. અહીં લાહોર, ઈસ્લામાબાદ, રાવલપિંડી, ક્વેટા, પેશાવર, કોહાટ સહિત અનેક શહેરો ભૂકંપના જોરદાર આંચકાથી હચમચી ગયા હતા. પાકિસ્તાનમાં ભૂકંપના કારણે 9 લોકોના મોત થયા છે અને અકસ્માતોમાં લગભગ 200 લોકો ઘાયલ થયા છે.

નેશનલ સેન્ટર ફોર સિસ્મોલોજી (એનસીએસ) એ અહેવાલ આપ્યો છે કે ભૂકંપનું કેન્દ્ર અફઘાનિસ્તાનના હિન્દુકુશમાં હતું, જે પાકિસ્તાનથી 180 કિલોમીટર દૂર છે. અફઘાનિસ્તાનમાં પણ ભૂકંપ સંબંધિત ઘટનાઓમાં બે લોકોના મોત થયા છે. આ સાથે જ દેશમાં હાઈ એલર્ટ જારી કરવામાં આવ્યું છે.