કેન્દ્રીય કૃષિ મંત્રી તોમરે ગુજરાતમાં નાળિયેર વિકાસ બોર્ડના રાજ્ય કેન્દ્રનું કર્યું ઉદ્ઘાટન

ભારતમાં વધી રહી છે નારિયેળની ખેતી,પ્રક્રિયા,બજાર અને નિકાસ - શ્રી તોમર

જૂનાગઢમાં વિશ્વ નાળિયેર દિવસ સમારોહનો પ્રારંભ,નેશનલ એવોર્ડ અને એક્સપોર્ટ એક્સેલન્સ એવોર્ડની જાહેરાત

જૂનાગઢ (ગુજરાત) / નવી દિલ્હી,2 સપ્ટેમ્બર 2022: કેન્દ્રીય કૃષિ અને ખેડૂત કલ્યાણ મંત્રી નરેન્દ્રસિંહ તોમરે આજે જૂનાગઢ (ગુજરાત) ખાતે નાળિયેર વિકાસ બોર્ડના છઠ્ઠા રાજ્ય કેન્દ્રનું ઉદ્ઘાટન કર્યું. નરેન્દ્રસિંહ તોમરે 24મા વિશ્વ નાળિયેર દિવસની ઉજવણીનું પણ ઉદ્ઘાટન કર્યું. અહીં તોમરે જણાવ્યું હતું કે ભારતમાં નારિયેળની ખેતીની સાથે પ્રોસેસિંગ અને માર્કેટમાં પણ વધારો થઈ રહ્યો છે ત્યારે આપણો દેશ તેની નિકાસમાં પણ અગ્રેસર સ્થાને આવી ગયો છે. બોર્ડ દ્વારા નાળિયેરની ખેતી કરતા ખેડૂતોને સરકારની યોજનાઓનો લાભ મળી રહ્યો છે અને તેમની આવકમાં વધારો થવાની સાથે તેઓ દેશના અર્થતંત્રમાં પણ યોગદાન આપી રહ્યા છે.

આંતરરાષ્ટ્રીય કોકોનટ કોમ્યુનિટી (ICC)ના સ્થાપના દિવસની યાદમાં દર વર્ષે 2 સપ્ટેમ્બરે વિશ્વ નાળિયેર દિવસની ઉજવણી કરવામાં આવે છે. આ વર્ષે વિશ્વ નાળિયેર દિવસની મુખ્ય થીમ છે - સુખી ભવિષ્ય અને જીવન માટે નારિયેળની ખેતી કરો. આ પ્રસંગે શ્રી તોમરે નાળિયેર વિકાસ બોર્ડના રાષ્ટ્રીય પુરસ્કાર અને નિકાસ ઉત્કૃષ્ટતા પુરસ્કાર વિજેતાઓને અભિનંદન પાઠવ્યા હતા અને વર્ચ્યુઅલ મોડમાં વિશ્વ નાળિયેર દિવસના સંદર્ભમાં કોચી (કેરળ) માં આયોજિત કાર્યક્રમમાં એકત્ર થયેલા ખેડૂતોને પણ સંબોધિત કર્યા હતા.

કેન્દ્રીય મંત્રી નરેન્દ્રસિંહ તોમરે જણાવ્યું હતું કે પ્રાચીન કાળથી નારિયેળનો ઉપયોગ પૂજા અને તેલ બનાવવા માટે કરવામાં આવે છે અને હવે પ્રોસેસર્સ દ્વારા વિવિધ પ્રકારના ઉત્પાદનો બનાવવામાં આવે છે. દેશમાં તેનું બજાર વધી રહ્યું છે અને આપણો દેશ પણ વિશ્વમાં નિકાસની દ્રષ્ટિએ અગ્રણી સ્થાને આવી ગયો છે. કેન્દ્ર સરકાર નારિયેળની ખેતી અને પ્રક્રિયામાં સતત વધારો કરવા માટે રાજ્યો સાથે સતત કામ કરી રહી છે. કોકોનટ ડેવલપમેન્ટ બોર્ડ દ્વારા યોજનાઓનો ગંભીરતાથી અમલ કરવામાં આવી રહ્યો છે. તેમણે કહ્યું કે નાળિયેરની ખેતી ખૂબ જ સારી ખેતી છે. તે જેટલી વધશે તેટલુ જ ખેડૂતોને તેમજ દેશને ફાયદો થશે. ગુજરાતમાં શરૂ થયેલા નવા રાજ્ય કેન્દ્રનો લાભ ખેડૂતોને મળશે,તેમની આવકમાં વધુ વધારો થશે અને નાળિયેરનું વાવેતર પણ વધશે તેવી આશા તેમણે વ્યક્ત કરી હતી. તોમરે મુખ્યમંત્રી ભૂપેન્દ્ર પટેલના નેતૃત્વ હેઠળની ગુજરાત સરકાર કૃષિ ક્ષેત્રે ખૂબ જ ગંભીરતાથી કામ કરી રહી છે તેની પ્રશંસા કરી હતી. રાજ્યમાં વરસાદ સારો થયો છે,કૃષિ વિકાસને લગતી યોજનાઓથી ખેડૂતો પણ ખુશ છે.

જૂનાગઢ પ્રશાસન,કોકોનટ ડેવલપમેન્ટ બોર્ડ દ્વારા આયોજિત આ કાર્યક્રમમાં ગુજરાતના કૃષિ, પશુપાલન,ગૌસંવર્ધન મંત્રી રાઘવજીભાઈ પટેલ,જૂનાગઢના સાંસદ રાજેશભાઈ નારણભાઈ ચુડાસમા, જૂનાગઢના ધારાસભ્ય અને અન્ય જનપ્રતિનિધિઓ અને કેન્દ્રીય બાગાયત કમિશનર ડૉ. પ્રભાતકુમાર ઉપસ્થિત રહ્યા હતા. શરૂઆતમાં,કેન્દ્રીય કૃષિ અને ખેડૂત કલ્યાણ મંત્રાલયના સંયુક્ત સચિવ અને બોર્ડના પ્રમુખ ડૉ. વિજયલક્ષ્મી નાડેન્દલાએ સ્વાગત પ્રવચન કર્યું હતું.

આ પણ વાંચો:રાજમાતા વિજયરાજે સિંધિયા કૃષિ યુનિવર્સિટી, ગ્વાલિયર ખાતે 11મી રાષ્ટ્રીય બીજ કોંગ્રેસનું ઉદ્ઘાટન